Num 26 | HUI | STEP | Warago timbuni tagira ibiyago ereba hayagola Anduane Homogohanda Mosesela Arono igini Eleasalahondo lamialu lalu,

b 26.9-10Dag 16.1-35

c 26.52-56Dag 34.13, Yos 14.1-2

e 26.61LBM 10.1-2, Dag 3.4

f 26.65Dag 14.26-35

Numbers 26

Isaraele agali halu mende dagalenego ogo

1 Warago timbuni tagira ibiyago ereba hayagola Anduane Homogohanda Mosesela Arono igini Eleasalahondo lamialu lalu, ^a 2 Áyu libugua Isaraeleali lenego bibahende ami agali habeheru mali pira kira (20) henebi pira kira (20) bolangua hene karubi bibahendenaga mini gili biai halibu. 3 Ani layago hale howa Mosese Eleasalame Anduane Homogonaga bi layadagua talialu bini. Libugua agali mali pira kirabi (20) pira kira bolangua hene hearubi bibahende mini gilibu wule ibai hadaba layagola bibahende hale halu íbu ngoai ho hene. Ti Iba Yodana angeha Moaba dindi ulini tigabi wiagoria Yarigo tano kaware dege íbu ngoai hene.

Tigua agali Iyibi dindi wahalu ibiyaru dagala handalu hemiria daga ogodagua tagira pene.

5 Yagaba igini wahene Lubene howa ibu damene ogodagua hene. Hanogobi Palubi 6 Heseronobi Kamibi uruni hene. 7 Agali mariali uruni tinaga aguanene heneru dagalamaga halu daosini dege pira mariani tebira halu handari kariani pira tebira (43,730) bibahende hene. 8 Palu ibu igini Eliaba hene. 9 Eliaba igini ogodagua hene. Nemuelebi Dadanabi Abiramabi henego ai wali agalime Abiramala Dadanala libu haru tinaga agali haguane dabo helearia libugua Mosese Aronolahondo mine halu libu Kora aria hearu baba hatago hene. Ani hatagoho howa ti bibahendeme Anduane Homogonaga bi doga haga hene. ^b 10 Ani bialu hemiria dindi gaibuki bialu gundu uli timbuni mbira wiyagola agali mine hagane uruni bibahende dindi uli ogoniha haealape hai halu dindi lone gegebu dai buwa agali biaru dindime yi hai ho wahene. Agali uruni ti bibahende Kora halu ibu aria handari kirani pira duria (250) biaru irame dai hayangi dege ani homene. Anduane Homogohanda ibunaga wali agali bu hearu mini hongoheore wilo mo wiahalu tigua mana ko ogonidagua nabule lelonaga ani bini. 11 Anigo Kora igini hearu ti horo ogoningi nahome hene.

12 Simiono ibu hameigini ogodagua hene. Nemuelebi Yaminibi Yaginibi 13 Serabi Saulubi hene. 14 Agali duriali uruninaga aguanene daosini dege pira kirani kira halu handari kira (22,200) bibahende hene.

15 Gada hameigini ogodagua hene. Sebonobi Hagibi Sunibi 16 Osonibi Eribi 17 Arodobi Arelibi uruni hene. 18 Agali karia uruninaga igini aguaneneru bibahende daosini dege pira mariani handari duria (40,500) bibahende hene.

19 Yuda hameigini ti henego ogodagua. Selabi Peresebi Serabi Heseronobi Hamulubi uruni hene. Perese ibu Heserono Hamulula libu aba hene. Bamba Yuda igini kirali Erebi Onanabi Kenana dindiha howa homene. 22 Agali duriali uruni ti aguaneneru dagalamaga howa daosini dege pira kariani waragaria halu handari duria (76,500) bibahende hene.

23 Isaga hameigini ogodagua hene. Tolabi Pubabi Yasububi Simironobi hene. Puba hameigini tinime tini mini Punu laga hene. 25 Agali mariali uruni tinaga agali bibahende dagalamaga halu daosini dege pira waragariani maria halu handari tebira (64,300) bibahende hene.

26 Sebulunu hameigini ogodagua hene. Seredebi Elonobi Yalelebi tebirali hene. 27 Hameigini tebirali uruni tinaga aguaneneru bibahende daosini dege pira waragariani handari duria (60,500) bibahende hene.

28 Yosebe ibu igini kirali hangu Manase Eberaimila hene. 29 Manase hameigini ogodagua hene. Magiri ibu Manase igini howa ibuni Gileada aba hene. Gileada ibu damene ogodagua hene. Iesebi Helegebi 31 Asarielebi Segemebi 32 Semidabi Hebebi 33 Hebe igini Selobehada ibu igini mbira nahe wandari dege aba hene. Ibu wane mini Malabi Noabi Hogolabi Miligabi Tirisabi uruni berene. 34 Hameigini waragaria uruninaga agali daosini dege pira duriani kira halu handari karia (52,700) bibahende hene.

35 Eberaimi hameigini ogodagua hene. Sudelabi Begebi Tahanabi hene. 36 Ani henego Sudela ibu Erana damene henerunaga mamali hene. 37 Hameigini uruni tinaga agali daosini dege pira tebirani kira halu handari duria (32,500) bibahende hene. Eberaimi hameigini Manase hameiginila libunaga mamali mbiraore Yosebe hene.

38 Beniyamini hameigini uru hene. Belabi Asabelebi Ahiramabi 39 Sebubamabi Hubamabi hene. 40 Ani howa Bela ibu Ada hameigini Namana hameiginila mamali hene. 41 Hameigini duria uruni ti aria agali daosini dege pira mariani duria halu handari waragaria (45,600) bibahende hene.

42 Dana ibu hameigini mbiraore Husimi hangu hene. 43 Hameigini ogoni ibunaga agali daosini dege pira waragariani maria halu handari maria (64,400) bibahende hene.

44 Ase hameigini ogodagua hene. Iminabi Isibibi Beriabi hene. 45 Ani henego ai Beria ibu aguanene kira Hebela Malagielela hene. 46 Ase ibu wane mbira mini Sera berene. 47 Hameigini tebira uruni tinaga agali daosini dege pira duriani tebira halu handari maria (53,400) bibahende hene.

48 Nabadali aria ti hameigini ogodagua hene. Yaselebi Gunibi 49 Yasebi Silemebi hameigini maria uruni hene. 50 Ani henego tinaga agali bibahende dagalamaga halu daosini dege pira mariani duria halu handari maria (45,400) bibahende hene.

51 Isaraele hameigini bibahende agali dege dagalamaga hai halu daosini dege handari waragariani mbira halu handari kariani pira tebira (601,730) bibahende hene.

52 Mani howa Anduane Homogohanda Mosesehondo lamialu lalu, ^c 53 Ai Isaraeleali hameigini mbira mbira ti wali agali kago manda bialu dindi ti karulape holobadago manda bialu tu wa tahabe. 54 Dindi tu wa taholenaga pigane ái harabe hondole ala ege to̱le̱ wiaru emeneni mini gili buwa baraga halu dindi podene mbira mbira ngago wali agali dewaliore harago ti dindi timbuni tu wa mialu wali agali daga emene harago ti dindi emene tu wa migi bibe, lalu Anduane Homogohanda lene.

57 Libai ti hameigini tebira Gesonobi Kohadabi Meraribi uruni hene. 58 Gesonobi Kohadabi Meraribi tinaga aguanene hameigini emeneru ogodagua hene. Libinibi Heberonobi Malibi Musibi Korabi hene. Kohada ibu Amarama aba hene. 59 Amarama ibu wali mbira Libai wane Yogebede berenego dabu bini. Yogebede ibu Iyibi dindini hemingi howa taba henenego berene. Yogebedehanda igiri kira taba henenego mbirago Arono mendego Mosesela taba henene. Ani bialu ibugua wandari mbiraore hangu Miriama taba henene. 60 Mani Arono ibu wali dabu bialu ibu oneme igiri maria mini Nadababi Abihubi Eleasabi Idamabi taba henene. ^d 61 Nadaba Abihu libugua Anduane Homogohondo ira hagua ngabiloinisenesi lomabu delaga winidagua ndo delalu hebiria libu homene. ^e 62 Libai hameigini igiri gali ege mbira bolangua henegoria howa agali damene bibahende dagalairi halu daosini dege pira kirani tebira (23,000) bibahende hene. Isaraele hameigini maru heba dagalamaga nahe Libai hameigini tini hangu dagalene. Anidagua binidagoni irane Isaraele hameigini maru biaruhondo dindi tu wa miyadagua ti dindi tu wa namiyagonaga ani bini.

63 Mosesebi Eleasabi Isaraele agali bibahendebi Yarigo tano abene uyurahayagi Iba Yodana ange dindi ulini tigabi Moaba dindi wiagoria howa libugua mini uruni gili bialu dagalene. 64 Abale pigane Mosese Aronolame dindi ko iba dalu naibaga Sainai dindi wiagoria howa Isaraele agali bibahende dagalai hene. Daga halu mende ogoni layangi agali Mosesehanda ala mini gili bini uruni aria mbira naheneore. 65 Bamba Anduane Homogohanda Mosesehondo lamialu lalu, Agali uruni ti dindi ko iba dalu naibaga ngagoha howa homai holebira, lalu lamini. Ani lenego lola halu agali ala hene uruni bibahende homai hene. Anigo agali kirali Yabune igini Kalebela Nunu igini Yosuala dege nahome haabo hene. ^f